लॉक डाऊन 4.0 : राज्य सरकारने केल्या नवीन गाईडलाईन्स जारी..

मुंबई : राज्य शासनाने लॉकडाऊन -4 ची नियमावली जारी करत पहिल्या तीन लॉकडाऊनच्या तुलनेत चौथ्या लॉकडाऊनमध्ये नियम थोडे शिथिल केले आहेत. याशिवाय जिल्हाधिकार्‍यांचा आदेश काढण्याचा निर्णय गोठविण्यात आल्याने आता त्यांना आदेश काढण्यासाठी मुख्य सचिवांची परवानगी घ्यावी लागणार आहे, अशा सूचना राज्य शासनाने दिल्या आहेत.

आज शासनाने काढलेल्या आदेशाशिवाय किंवा त्याच्या विपरित कोणतेही आदेश काढायचे असल्यास स्थानिक प्रशासनाला मुख्य सचिवांची परवानगी घ्यावी लागणार आहे. स्थानिक प्रशासन राज्य पातळीवर काढलेल्या आदेशांची अंमलबजावणी न करता आपल्या स्तरावर वेगळे आदेश आणि निर्णय घेत असल्याने गोंधळाची स्थिती निर्माण होते. हा गोंधळ होऊ नये म्हणून आता कोणताही निर्णय घेताना मुख्य सचिवांच्या परवानगीचे बंधन घालण्यात आले आहे.
काय आहे नवी नियमावली?
रेड झोन वगळता इतर झोनमध्ये नव्या नियमावलीत लॉकडाऊनमध्ये सूट देण्यात आली आहे.
रात्रीची संचारबंदी
आता रात्रीची संचारबंदी असणार आहे. संध्याकाळी 7 ते सकाळी 7 सर्व सेवा बंद राहणार, अत्यावश्यक सेवा वगळता संध्याकाळी 7 ते सकाळी 7 पर्यंत बाहेर पडायला मज्जाव असणार आहे.
या व्यक्तींनी घराबाहेर पडू नये
65 वर्षांवरील वृद्ध, गरोदर महिला, इतर आजार असलेल्या व्यक्ती, 10 वर्षांखालील मुलं यांनी घरीच थांबावे, वैद्यकीय कारणासाठीच घराबाहेर पडावे
असे आहेत झोन
रेड झोनमध्ये मुंबई, एमएमआरमधील सर्व महापालिका, पुणे, सोलापूर, औरंगाबाद, मालेगाव, नाशिक, धुळे, जळगाव, अकोला, अमरावती या महापालिका आहे. तर उरलेले क्षेत्र बिगर रेड झोन क्षेत्र आहे. कंटेन्मेंट झोनमध्ये लॉकडाऊनची कठोर अंमलबजावणी केली जाणार आहे. कंटेन्मेंमट झोनमध्ये अत्यावश्यक सेवा वगळता इतर सर्व व्यवहार बंद होणार आहेत.
रेड झोनसाठी या महत्वाच्या सूचना
अत्यावश्यक सेवेची सर्व दुकाने, इतर दुकानांना परवानगी, त्याबाबत स्थानिक प्रशासन निर्णय घेणार आहे. स्थानिक प्रशासनाने परवानगी दिली तर दारूची दुकाने सुरू करता येणार, दारूच्या होम डिलिव्हरी करता येणार आहे. टॅक्सी, रिक्षा सेवा बंद राहतील. चार चाकीमध्ये 1+ 2 आणि दुचाकीवर एकालाच परवानगी असेल. मॉल्स, परवानगी नसलेली दुकाने, परवानगी नसलेली इतर आस्थापने साफसफाईसाठी सकाळी 9 ते संध्याकाळी 5 या वेळात सुरू ठेवू शकतात. दस्त नोंदणी कार्यालय, आरटीओ कार्यालय सुरू करण्याची परवानगी असेल. विद्यापीठ, महाविद्यालयात उत्तरपत्रिका तपासणी, निकाल लावण्यासाठी 5 टक्के कर्मचारी उपस्थित ठेवण्यास परवानगी दिली आहे.
नॉन रेड झोनमध्ये काय नियम
स्पोर्टस् कॉम्प्लेक्स, स्टेडियम, खुल्या जागा वैयक्तिक व्यायामासाठी सुरू राहणार, पण सामुहिक जमावाला बंदी असणार आहे. आंतरजिल्हा बससेवा 50 टक्के प्रवासी क्षमतेने चालविण्यास परवानगी दिली आहे. सर्व दुकाने आणि बाजारपेठा सकाळी 9 ते संध्याकाळी 5 या वेळेत सुरू राहणार, मात्र गर्दी झाल्यास हे बंद करण्याचा निर्णय स्थानिक प्रशासन घेऊ शकते. बिगर रेड झोनमधील सलून सुरु करण्यास परवानगी दिली आहे.
काय बंद राहणार
ट्रेन, मेट्रो, विमान सेवा सर्वच झोनमध्ये तर आंतरराज्य रस्ते वाहतूक बंदच राहणार आहे. शैक्षणिक संस्था, हॉस्पिटल, हॉटेल, मॉल, प्रार्थनास्थळे, बंदच राहणार आहेत.